شاب وفتاة متحابان يلتقيان فتدور بينهما هذه المحاورة

شاب وفتاة متحابان يلتقيان فتدور بينهما هذه المحاورة
والمحاورة باللغة العامية

تقول الفتاة معترفة بحبها:
بدّي حبّك وحبّك أكثر ....... غنّي أرقص وفرحة تكبر
ضُمّك تحت جناحي طِير ....... نِمشي حبيبي ما نتعثّر
قول بحبِّك مسك وعنبر ....... لاتخلّي قلبَك يتحجّر
زرعتَك وردي بين ضلوعي ....... حتى من عطرك إتعطّر
قول بحبك لا تتأخر ....... لا تندم يوم وتتحسّر
لمّا بتبعد يا حبيبي ....... دمعي ع خدّي بيتحدّر
دمعي عم يطفر ويتذمر ....... آهاتي تلين وتتكسّر
من بُعدَك ببكي بتمرمر ....... قُول بحبك لا تتستّر
إنتَ بقلبي بتتصدر ....... ما ممكن عنّك إتحوَّر
إنت بعيوني أمير ....... جاي ع حصانك تتمختر
حبّيتَك تاصرت كبير ....... ياخوفي بحبّي تتغيّر
أني لغيرك ما بصير ....... حُبّي بِقَلْبَك متحيّر
بدربك فرشت الحرير ....... لا تكون لغيري متسيّير
إنت بلبل عم يتغندر ....... إنتَ حكايي عم تتسطّر
إنت آيي إنت مرايي ....... إنت غايي عم تتطوّر
إنت الكلمي إنت الغنوي ....... إنت حبّي ينمى ويكبر
سبحان خدودَك هالحلوي ....... تكوّن فيهن أحلى منظر
بحس بحبّك عم يتعمّر ....... حجارو قويي ما بتتدمّر
روقْ اسمعني لا تتوتّر ....... لا تعصّب منّي وتتزمجر
لازم يا حبيبي تخطبني ....... لا تتراجع لا تتأخر
لا تبعد عنّي وتهجرني ....... قلبي من جوِّي بيتمرمر
بادلني شعورك خبّرني ....... ع اللي مخبّى ع اللي بيظهر
قرّب لشفافي قبلني ....... بين شفافك متل السكر
اشبك إيدي وغمرني ....... بشوف حياتي صارت أنضر
من نسمة عطرك شممني ....... اشكل شعري بورد الأحمر
ع جناح الشوق توديني ....... بحلم بعيد صاير أخضر
زيّن هالدني بالزّيني ....... كل الكون حولي أزهر
خذني لبيتك خبّيني ....... لا تمل منّي لا تتذمّر
لا تحاول إنك تنسيني ....... كل همومي عم تكبر
وكنوز الدني تغريني ....... إنّي تركك ما بتأثّر
وكنوز الجان بتهديني ....... ذهب ولولو بصحن المرمر
ماممكن عنّك تغنيني ....... كتير بحبّك ما بتتصور
لا تبعد عنّي وتجفيني ....... مُت بحبّك ولفي الأسمر
إذا بتهجرني بتكويني ....... بحس بغضبي رح يتفجّر
وبساعة فرح تبكيني ....... بتنسى الماضي ما بتتذكر
عم تسأل شو صاير فيني ....... جسمي بينحل وجهي بيصفر
خدودي غارت وجبيني ....... شاب الشعر الغادي أشقر
هيك بتهجرني وتبليني ....... بلوة مالك لفارس عنتر
لكن إذا بدّك ترضيني ....... إنت حبيبي تبقى الأجدر
حبّك يعذبني يضنيني ....... حِن عليّ لا تتجبّر
وبحبّك لو عشت سنيني ....... بقلبي حبّك ينمى ويكبر

الشاب يرد على حبيبته باعترافه بحبه لها:

سرّي بكتم ما بيتخبّر ....... ما ممكن إنّي إتصبّر
سمعت كلامك مثل السكر .......وعلّم بقلبي كالخنجر
حَلْ لُغزِك عم يتعسّر ....... ودموعي سكنت بالمحجر
قلتي كلامِك أكتر وأكتر .......من الصعب عليّ يتفسّر
بمضّي ليلي كلّو بسهر ....... بصوم بصلّي بشهدك إفطر
أيام بتمرق والأشهر ....... قمرك ب ليلي عم يظهر
شوفي دمعي صاير أمطر .......فوق جبال بوادي الأخضر
حتّى يروي الزرع الأنظر ....... زهر وزنبق ورد الأحمر
يكبر شجر الحب الأبهر .......اجني خيرو كلّو أثمر
مابنسى حبك ما بجهر ....... لو كان دربك صار أخطر
بجاهد بحبك تا إظفر ....... لو يمنعني جيش العسكر
بحارب بزندي ما بخصر ....... بقوة ترسي وسيفي الأبتر
عندي حصان مسمى الأبجر .......عندي درعي ما بيتكسّر
لكل عوائق بتحضر ....... ما بهاب الموت المودّر
لو يظهرلي جند إسكندر ....... ذو القرنين إلو بقهر
بإيدي بصرع بطل الأجسر .......وباني سور الصين تعمّر
بغمزة عينك صير مسمّر ....... بأرضي مثبّت ما بتحرر
بقول بحبك وقولي مكرر ....... قدام الناس فيكي بفخر
لاتفكري بحبك إتمكّر ....... حبّي صادق ما بيتعكّر
بفكري لذكرك ب فَكَّر ....... دربي بنورك متنوّر
بصرخ بصوتي اللي بيزأر ....... بعلن حبّك فوق المنبر
لو بقولوا دربك أوعر ....... بمشي بدربك ما بتأخر
بصير بدربك لو يتجمّر ....... بلهب النار شعل وأسعر
ما بخاف النار ولا بذعر ....... ما بخلّي دروبي تتسكّر
ما بخلّي أموري تتعسّر ....... بحنكة عقلي تصير الأيسر
بجوز أملك نهر الكوثر ....... أو أستولي عرش القيصر
أو شي مرّة أحكم عنجر ....... أو كون مرّة ملك بحمير
أو يعطوني قصر مقنطر ....... أو يهدوني در مدوّر
ما ممكن إنّي إتغيّر ....... أو بحبك يوم إتحيّر
أصلي من الجبل متحدّر ....... عندي امارة فيها بسكر
عندي شعري كتير موفّر ....... بدوّن بكتب بطبع دفتر
ما بفضح حبّك ما بجهر ....... بحفظ حبّك بقلبي الأصغر
حبّي طاهر ما بيتغيّر ....... خيالك بذهني بيتحفّر
إذا حولي الكل تجمهر ....... بقول بحبّك ما بتودّر
بحمد ربّي متل استغفر ....... لله وحدو بحمد بشكر
بحلف بالحب المتشجّر ....... تبقى بالقلب المتصبّر
بغنّيلك في قول استشعر ....... بتغزّل بالوجه المدوّر
لو بقولوا بحبّو تجبّر ....... حب حبيبي ما بيتعبّر
كيف بخبّي دمع تفجّر ....... بنص شباط كلامو تخبّر
بسكّر من رضب المتخمّر ....... خمر شفافك شهد تقطّر
من بعدك نجمي عم يسهر ....... ببكي عالود المتمرمر
بحبّك, وحبّي عمّا يكبر ....... ماممكن بغلطة اتدهور
قلبي مش ممكن يتحجّر ....... إذ كان عمري بحبّك ختير
يشملنا القفص المسوّر ....... صافي قلوبنا ما بتتغير
حبّي لحبيبي متنذّر ....... بوفائك يبقى متنصّر
يلّا نحقق أمل إستبشر ...... نشرب كاس الحب تخمّر
راية حبّك تبقى الأنصر ....... هيدي حقيقة فيها الجوهر
يبقى حبّك أغنى وأوفر ....... بقلبي المضني المعثّر
إذا الحكي علينا تشوشر ....... عنّك مش ممكن إتأخر
إذا عليّ الكل تثور ....... بهرب منهن حدّك بحضر
المهم بحبّك إضفر ....... ما يمنعني شوق إستنضر
أو يمنعني بُعد سفر ....... حبّك صامد ما بيتكسّر
قصة حبنا تبقى الأشهر ....... بلسن الناس تروى تنشر
منتحاشى البغض المدبّر ....... ما يهم الواشي المثرثر
منتجنب قول اللي بيقهر ....... ما نضل حكاية تتجرجر
ظلّي بقلبي حبّك أطهر ....... إنتي حبيبتي ما بتْنَكّر

كتابات باسم عبد المسيح سركيس
أبو عبدالمسيح