ضيعتنا

سلام عليك ضيعتنا.......فيكِ زرعنا محبتنا
مهما تباعدنا الأيام.......قريبي إنشاالله رجعتنا
....... ....... ....... ....... ....... ....... .......
فحيلي يا أحلى الأوطان....... ترابك محروس ومنصان
بطلب من ربي الرحمن ....... يفقي عين النحستنا
....... ....... ....... ....... ....... ....... .......
فحيلي يا تل الرمان ....... يا مروجك ورد وريحان
وقت منتمشى ببستان ....... البسمة تغمر شفتنا
....... ....... ....... ....... ....... ....... .......
وقت منتمشى عالدرب ....... هواها بينعش كل القلب
دخلك بالله يا هالرب ....... تظل الخضرة بكرمتنا
....... ....... ....... ....... ....... ....... .......
تذكر يوم كنّا زغار ....... نلعب نمرح ليل نهار
هلق لمّا صرنا كبار ....... راحت غابت عادتنا
....... ....... ....... ....... ....... ....... .......
بتلاقو كل الخلان....... بعيدك يا مار اليان
والدبكة بين الشبان ....... ونشرب كاس محبتنا
....... ....... ....... ....... ....... ....... .......
هيدا الفرحان وسهران ....... هيدا البيتو شو مليان
هيدا عاشق وهويان ....... بنت الضيعة بديرتنا
....... ....... ....... ....... ....... ....... .......
القهوة المرة عزتنا ....... هيي رمز ضيافتنا
عمادك عالي خيمتنا ....... تتبقى فوقك رايتنا
....... ....... ....... ....... ....... ....... .......
شو حلوة عنّا الأعراس ....... يلّا نضرب كاس بكاس
فرحة تغمر كل الناس ....... بكنيستنا وصالتنا
....... ....... ....... ....... ....... ....... .......
الأحلى منها العماد ....... نتنلبس ثياب جداد
تهنّوا بدينكم يا أولاد ....... هيدا دينك عذرتنا
....... ....... ....... ....... ....... ....... .......
نحنا تأخينا المسيح ....... يوم الغفر ذلّتنا
حتى خطايانا يزيج ....... بعمادتنا طهارتنا
....... ....... ....... ....... ....... ....... .......
من بعد حسن التفكير ....... نحنا مننطق كلمتنا
لكل بناتنا منحير ....... منحفظهن بحمايتنا
....... ....... ....... ....... ....... ....... ....... .......
نحنا اللي منبقى منقول ....... يوم الهيجا نشد خيول
منحكي وفعلنا مفعول ...... نكسر إيد الهانتنا
....... ....... ....... ....... ....... ....... ....... .......
شو بعد بخبر يا فلان ....... ع اللي هاجروا الأوطان
خلّو بالقلب الأحزان ....... ع فرقتهن دمعتنا
....... ....... ....... ....... ....... ....... ....... .......
هيدا هاجر كل مكان ....... طلبو ما كان الهجران
هيدا راح الأمريكان ....... فضيت خليت ديرتنا
....... ....... ....... ....... ....... ....... ....... .......
نحنا منقول الموال ....... نحنا غنينا الأزجال
من عنّا صار الرجال ....... يرقّص خيل بساحتنا
....... ....... ....... ....... ....... ....... ....... .......
أكرمنا ما بخلنا بمال ....... ومنكرم بكل الأحوال
منعطي منمشي هالحال ....... تبقى حلوة سمعتنا
....... ....... ....... ....... ....... ....... ....... .......
منعطى ومنكرم ونجود ....... كرمنا ما إلو حدود
يوم نجود من الموجود ....... تحكي الناس بسيرتنا
....... ....... ....... ....... ....... ....... .......
منحبك يا ضيعتنا ....... هيدي أحلى كلمتنا
كل الناس الشافتنا ....... ع محبتنا حسدتنا
....... ....... ....... ....... ....... ....... .......
منشتقلك نحنا ولادك ....... رح نرْجَع أرض ترابك
علينا لو طال غيابك ....... ما منساكي ضيعتنا
....... ....... ....... ....... ....... ....... .......
وتبقى حلوة الأزهار .......عطرا بزيّن هالدار
شو حلوة عنّا الأشجار ....... زهرك أبيض لوزتنا
....... ....... ....... ....... ....... ....... .......
نبقى نحبك أوطاني ....... هيك جدّي وصّاني
بيّي بأرضِك ربّاني ....... إمّي بحبك ربتنا
....... ....... ....... ....... ....... ....... .......


لبنان
الجمعة 13 / 3 / 1998
باسم عبد المسيح سركيس