أحلى ردة قرادي

موضوع: أحلى ردة قرادي 2011-01-06, 20:58

........أدمن ........
الحلوين بيبقوا حلوين
مهــما الزمـان تعكر
ويا مخـــول مثلك مين
قلبك أحلى من السكر
إن جينا نعد الزجــالين
اللي من بيت عسكر
بيطع الكل مشهورين
وخصوصــي بالقــرادي

........مخــول........
الحلوين بيبقوا حلوين
أحلاهم بنت الشقرا
دخلك قلّي متلا مين
لا حنطية ولا سمرا
خدودا أحلا خدين
بوسة تسكر كالخمرا
عيونا يا سيف بحدين
سنّو أمهر حدادي

........أدمن ........
ببعثلك من هون شقرا
أجمل وأحلا السويدية
مـن طلباتـها رح تعـرا
ورح تحاكــي الجنية
بعثلي من عندك سمرا
أم عـيون العسلية
وخلينا نشرب خمرا
محـبة بنات بـلادي

........مخــول........
لا بالسويد ولا سويسرا
في متل فحيلاوية
بنظرة بتنشر سحرا
بتفتن صبح وعشيّة
بدّك من عندي سمرا
تكون عيونا عسلية
تفضل لعنّا بسهرا
منحكي ونكتب قرادي

.........أدمن ........
الفحيلاوية بنت أصول
بتخطف بنظرة الشعار
وكلـمة حق فيها بقول
عقلها بيوزن بالقنطار
ولعندكم الجية معقول
شو رأيــــك بأول آذار
بلكي هالقصة ماتطول
ونفرح بشبك الأيادي

........مخــول.........
فحيلة بوابا مفتوحة
بأذار وكل الشهور
ارضا تلّا وسروحا
بقيو عمرّ العصور
عنبة ولوزة وتفاحة
مع صوت التركتور
أحلا قعدة بصراحة
بفيّك زيتون بلادي

........أدمن .........
ياريت وعلــوّاه فيني
أسكن كل عمري فيها
وخلي الحلـوة تغنّيني
وقلبـــي يكون قوافيها
من محبتي ومن حنّيني
دروب الفحيلة جاييها
وبحلف بربـي وديني
مش قادر أنطر زيادي
.................